[Fun] Shrek 2

雖然近排冇咩特別出眾o既Xbox遊戲推出，但係農曆年假期間又有咩活動舒服得過留響屋企打機呢？一個人玩可能會悶，當然有Live!就更加好（又要插一插WE8 International）。不過原來冇Live!一樣咁過癮，因為可以叫埋班朋友一齊面對面打過兼拜埋年，一舉兩得，真係連寬頻都慳番。
點解無端端會咁講呢？話說Pekingman同我一樣都好鍾情Party Games，貪佢可以招呼朋友。但係Xbox真係好少哩類遊戲，我連唯一一隻珍藏【功夫大亂鬥】都惜埋俾佢（我諗都好少人有哩隻遊戲，仲要覺得佢好玩），不過佢依然未夠皮，係都要睇睇有冇其他Party Games。
結個皇天不負有心人，終於俾佢搵到哩隻Shrek 2。我都走漏眼唔知哩隻係Party Game，諗住只係普通Action Game。Pekingman去到我屋企諗住試一試隻Game。點知一試，隻Game就發揮Party Games獨有威力，將老細同另一個老友一齊吸住，四個人由年初四夜晚十一點打到第二朝六點，然後食埋早餐先返屋企。
真係諗唔到成晚就係放過一隻Game落部Xbox，四個大男人玩到鬼殺咁嘈。每人控制一個擁有唔同能力o既角色去完成任務，就好似The Lost Vikings（多謝老細提醒）。箇中好玩攪笑之處真係非外人能明白，好似四人大戰Puss in Boots，可愛大小薑餅人，當然唔少得Hero Time……（真係諗過放棄）
最後由Pekingman所控制o既史力加飛身一壓完成任務。
真係好難得又好難望o既一次打機體驗，所以一定要記低佢。